Mate Rap Dohot Kristus

Kolose 2 : 20 – 23 Sada poda na niajarhon ni apostel Paulus sitiopon ni rohanta ima sude angka na porsea di pangulaon ni Tuhanta i, tarjou do hita gabe mate rap dohot Kristus. Debata do na pamasukhon hita tu bagasan Kristus, asa di na mate i Ibana, dohot ma hita mate dohot Tuhanta i. Dang holan i, di na hehe Ibana sian na mate, dohot do hita hehe rap dohot Ibana. Suang songon i do nang di hundul Ibana di banua ginjang rap dohot Ibana. Sada do dalan ditontuhon Debata asa malua hita sian uhuman na ingkon jaloon ni ganup pardosa. Uhuman i i ma hamatean. Alani i dipamasuk Debata ma hita tu bagasan Kristus, asa dipadohot hita saluhut mengalami aha na nialaman ni Kristus Jesus Tuhanta i. Ala naung di bagasan Kristus hita, dipadohot ma hita di nasa natinaon ni Kristus i. Dang holan diparungkilon hita dipadohot, alai dohot do di hasangapon. Turpukta mamodai hita na mandok dang diportibi on be hita mangolu, alai di harajaon banua ginjang nama. Ala ni i dipodai si Paulus do huria Kolose, suang songon i do nang hita pe, asa unang be unduk tu nasa tondi na sian portibi on. Idaon songon hadaulaton na tutu situtu do na mangajarhon i, hape na sian portibi on do poda i dang na sian Debata na di banua ginjang. Angka parbarita na lilu do mangajarhon poda i, jala idaon sian duru songon na uli, ai diajarhon nasida asa dipatutoru nasida rohana. Hape dang na sian Debata tondi na mangajarhon asa di patutoru dirina, na sian portibi on do i. Dungi muse tondi na sian portibi on sain a mangajarhon angka patik na sian portibi on. Ala naung dipalua Tuhanta i hita sian dosa, gabe dohononta ma dang sian banua ginjang angka patik na ingkon siulahononta na niajarhon ni parbarita na uli i. Sada na ingkon porlu tiopon ni angka siihuthon Jesus, ima nunga rap mate hita dohot Kristus. Jolma naung mate rap dohot Kristus dang unduk be ibana tu angka aturan na binaen ni manusia. Idaon songon na Daulat hita na mangulahon i, alai sasintongna dang sian Amanta Parbanua ginjang angka aturan na ingkon ulahononton i. Didok nasida unang pangan on, unang jama on dohot angka aturan na asing dope.